20 fevral 2012-ci il tarixində Xəzər rayon MKS-in Mərkəzi kitabxanasında 21 fevral Ana dili gününə həsr olunmuş “Ana dilimizi sevək qoruyaq” adlı sərgi-söhbət keçirildi. Tədbirdə 136 saylı məktəbin şagirdləri iştirak etdilər. Xəzər rayon MKS-in kitabxanaçısı S.Həsənova ana dilimiz haqqında məlumat verib, ana dilimizi sevməyimizi və qorumağımızı bir daha vurğuladı.

Dil hər bir millətin maddi və mənəvi irsini qoruyan və inkişaf etdirən ən mühüm və ən güclü vasitədir. Hər bir insan öz ana dilini yaxşı bilməli və onu qorumalıdır. Ana dili insanın mənəvi aləminin zənginləşməsində, dünyagörüşünün genişlənməsində, mükəmməl təhsil almasında, öz soydaşları ilə ünsiyyət qurmasında mühüm rol oynayır. Ana dili millətin özünəməxsusluğunu qorumaqla yanaşı, tərcümə vasitəsilə başqa xalqların mədəni irsi ilə tanış olmağa, onlarla ünsiyyət qurmağa imkan yaradır. Bu gün beynəlxalq ana dili günü kimi qeyd olunur. Azərbaycan Respublikasının səkkiz milyonluq əhalisinin gündəlik ünsiyyət vasitəsi və rəsmi dövlət dili Azərbaycan dili İran İslam Respublikasında yaşayan soydaşlarımızın da ana dilidir. Rusiyada, ABŞ-da, Türkiyədə və Qərbi Avropa ölkələrində də azərbaycanlılar yaşayır. Bir neçə yüzilliklər ərzində müxtəlif ölkələrin sakinləri olmalarına baxmayaraq, bu gün də hansı ölkədə yaşamalarından asılı olmayaraq, azərbaycanlılar bir-birlərini sərbəst anlayırlar. Beləliklə, yer üzündə hazırda Azərbaycan dilində danışan 30 milyondan çox adam yaşayır.
Azərbaycan dilinə dövlət qayğısı da bu dilin milli dəyərlər içərisində ən qiymətlisi olduğuna sübutdur.

Bu dil həyata sevgisini hopduran məxluqun dili, ayaqlarının altı behişt olan ananın dilidir.

Bu dil Nizamilərin, Nəsimilərin, Xətailərin, Babəklərin dilidir. Xalqımızın ən qiymətli sərvətidir.

İllər keçsə də, insanlar yaşa dolsa da, unutmayaq, dil hər zaman var. Və bu var olanı qorumaq, gələcək nəsillərə çatdırmaq hər birimizin müqəddəs borcudur